Demo Editorial. Unha proposta de Agasallo.eu

Rúa Gramela, 23, baixo. 15010 A Coruña
T. 981928167
Email
Web

O noso proxecto editorial nace a finais de 2008 como alternativa de autoedición do autor Manel Cráneo.

En 2009 sae ao mercado Os lobos de Moeche, un cómic de aventuras e divulgativo, grazas a colaboración coa entidade Euroeume. O libro úsase como peza de promoción do Museo do Castelo de Moeche e simultaneamente comercialízase no circuíto de librarías galegas.

Ao pouco tempo comezan a chegar propostas doutros autores galegos interesados en publicar co selo; e, de xeito natural, a iniciativa vaise consolidando como proxecto editorial.

A liña principal de edición está baseada na potenciación de autores galegos en lingua galega, atendendo especialmente a temas relacionados co patrimonio pero sempre desde un enfoque lúdico e asumible para calquera tipo de lector.

Co tempo foron nacendo tamén distintas liñas de edición temáticas que atenden aos nosos gustos persoais, como a Colección HäinöS, Eumedievo ou a Colección Castelao.

En 2011, recibimos o Premio Ourense de Banda Deseñada á mellor iniciativa, que o editor, Manel Cráneo, adicou á memoria de Benito Losada, un dos maiores impulsores da BD en Galicia.

Durante tres anos gañamos o Concurso Castelao de Edición da Deputación da Coruña editando ás obras premiadas no Concurso Castelao de Banda Deseñada.

Na actualidade o noso catálogo conta con máis de vinte títulos e o recoñecemento de moitos lectores. Apoiamos novos autores, rescatamos e potenciamos tamén a clásicos do panorama galego e seguimos facendo medrar o noso catálogo esperando que co tempo poida traspasar fronteiras, coma xa ocurreu coa obra Sen mirar atrás de Dani Montero, editada en galego, español e alemán.