Illa Bufarda
Illa Bufarda é un territorio creativo que medra co tempo con cada proxecto que agroma na súa superficie. O seu clima caracterízase durante todo o ano por abundantes tormentas de ideas e temperaturas atmosféricas moi expresivas. O ecosistema é tan diverso en fauna e flora coma os imaxinarios que a transitan.
O nome deste novo territorio fai referencia ás pequenas xanelas das tradicionais construcións galegas polas que se filtran os raios de luz: as bufardas, a través das cales podemos encadrar historias, imaxes, paisaxes e un sen fin de realidades e ficcións.
As habitantes da Illa Bufarda comunícanse principalmente co audiovisual, linguaxe que abrangue moi diversas expresións: animación, fotografía, deseño... coas técnicas máis acaídas para cada proxecto.
